Luke 20

Yeesus uuwowa onoma wiar nokaremik

(Matiu 21.23-27, Mak 11.27-33)

1Aria iir oko Yeesus tempel koor kemena-pa ikok mua unowa Mua Maneka opora suule wia onam-ikua. Naap onam-ikaeya wi pris woos mua, wi sira amis mua ne wi owow woos mua, unowiya o wiar ekapep nokaremik, “Ei, no maa unowa onin fain naareke nefa sesekeya naap onin? Ne naareke kekanowa niemi uuwowa fain niek?” 3Naeya wia maakek, “Yos pun opora-ko nia nokarinen. 4Feenap, iiriw Yon Baptais eka-pa wia yasuwam-ikua nain Mua Maneka-ke uuwowa iwok-i e wi mua-ke maakemik? Yo efa maakeka.” 5Naap wia nokareya wi-wieniw maemik, “I feenap maiyen-na, ‘Mua Maneka-ke uuwowa nain iwok,’ naap maiyen-na mainon, ‘Naap nain ni moram opora me wiar opaman?’ 6Ne i feenap maiyen-na, ‘Mua-ke uuwowa nain iwemik,’ naap maiyen-na, ikoka mua unowa fain-ke nomon ika yiarikuan. Moram wi Yon Mua Maneka profet-ke naimik.” 7Naemi opora feenap maakemik, “I Yon Baptais uuwowa onoma nain me wiar amisaremik.” 8Ne wia maakek, “Naapeya-na yos pun me nia maakinen, mua naareke mauwowa fain yiek.”

Wain piita urufow mua arekin opora-ke

(Matiu 21.33-46, Mak 12.1-12)

9Ne aria Yeesus wi unowa nain arekin opora fain wia iromak, “Mua oko wain piita onap mua oko wapena-pa wia wuap-puomami owow oko epasia ikiwep nan ikua. 10Nan ikok wain makena aawow saana-pa ona uuwow mua oko sesekak, wain makena-ko wiiwkin pekapominok naep. O iwap fuuneya wi teeria nain-ke opap aruf-iraparemi oram sesekiwkin kirep ikiwok. 11Ne mua oko sesekak. Ne os pun arufami emina ururowami oram sesekiwkin ikiwok. 12Ne nainiw oko sesekak, nain-ke arow arek. Os pun sira naapiw onamik, samor akena arufami iiraremik. 13Wi naap wia oniwkin manin wiawi nain kema unu-unowa wuap maek, ‘Nee, yo kamenap oninen? Yena muuka kuisow fain senam akena kookaliyem, nain sesekamkun ikiweya ekima opap opora wiar miimikuan-yon.’ 14Naap maep ona muuka sesekeya ikiwok. Ikiwep fuuneya urufap maemik, ‘Nee, ona muuka nanek. Ikoka os-ke wiawi epa wiar aawinon. Arika, ifakimikua. Ne miiwa ne maa onoma is-ke wiar aawiyen!’ 15Naap maep opap pika okaiwi-pa wafurap ifakimiwkin umok. Aria manin onom mua nain ikoka kamenap-ko wia oninon? 16O ikiwep wia ifakimurumep, manina nain mua papako wapena-pa wiar wuinon.” Naap maeya wi unowa nain miimap maemik, “Nee, maa naap nain me imenarinok noma.”

17Naeya wia mokakemi maek, “Yo opora maem nain makena. Naapeya Mua Maneka opora siisimep-puamik fain kamenap-ke? Feenap maek,

‘Poka iiriw wi koora kuow mua-ke samora-ke naep iiraremik. Aakisa poka nain-keriw umua poka arep ikua.’
(Someka 118.22-23)

18Wi mua poka neeke wakikuan-na oona iiwawun ku-kuep sowa sowa arikuan. Ne poka nain wi mua mia-pa wiar oromi wia ifemakinon-na iiwawun ititalep mefa kuikuan,” naap maek.

19Wi pris woos mua ne wi sira amis mua opora nain miimap i yia maek naemik. Naapeya iir nain akena wi Yeesus opu naemik-na wi emeria mua wia keker opamik.

Siisar takis iwowa sira nain Yeesus nokaremik

(Matiu 22.15-22, Mak 12.13-17)

20Aria Yeesus opora-pa wuau naep baliwep akena wuam-ikemik. Naap ikok mua papako kokot wia sesekamik, wi mua eliwa saarik arep ikiwep o akimami nokaruk naep. Ne ikoka opora samoreya-na opap anim onoma wapena-pa wuikuan. 21Wi teeria nain-ke ikiwep Yeesus nokaremik, “Oo somek mua, i nefa amisaremik, no opora aakunin nain ne suule wia onin nain makena. Ne nos pun i mua yia mekawap me aakunin, weetak. No anane Mua Maneka opor maken akena nain wia maakin. 22Aria no aakisa kamenap main? Rom saria maneka Siisar takis wuowa yia maakek nain, wuiyen-na Moses sira wuomakek nain puukiyen-i e weetak?” 23Ne wi wadol sira iiriw wiar amisarek. Naapeya wia maakek, 24“Maamuma kuisow pekapep efa ofakoweka.” Pekapiwkin wia nokarek, “Maamuma fain mua naarew kukusa ne unuma-ke wiar ikua?” Ne maakemik, “Siisar kukusa-ke.” 25Ne maek, “Naapeya-na Siisar maamuma nain ona iweka, ne maa mauwa Mua Maneka wiarik, nain ona kakeniw iweka.” 26Wi emeria mua unowa mokoka-pa naap wia maakeya soranep rurukerap oram maneka iimarep ikemik. O opora-ko nainiw me maakemik.

Mua umep ikok iikirowa nain Yeesus nokaremik

(Matiu 22.23-33, Mak 12.18-27)

27Aria wi Sadusi teeria-ke maimik, mua umimik nain ikoka kiiriw me iikirikuan. Naapeya wi ekapep Yeesus nokaremik, “Somek mua, sira iiriw Moses wuak nain feenap yia siisimep-puomak, ‘Mua oko emeria aawep muuka marew ikok umeya-na, ona wiamun-ke apura nain wiar aawep muuka wiipa weepe imenominok.’ 29Aria kaka kuisow nain, mua ikur okaiwi-pa erup ikemik. Ne iperowa-ke kiikiriw emeria aawok, ne muuka wiipa me imenowa ikok umok. 30Umeya o ookap onarek nain-ke apura wiar aawok. Os pun naap muuka marew ikok umok. 31Ne kiiriw oko pun apura nain aawok nain pun naap ikok umok. Ne teeria nainiw akena emeria kuisow nain aawep umomakemik, muuka-ko me imenamik. 32Naap ikok apura nain pun umok. 33Ne teeria kuisow nainiw emeria kuisow. Naeya wiimar iikirow epa-pa mua naarew emeria wiar ikainon?” 34Naeya wia maakek, “Aakisa miiwa fain muewimik. 35Ikoka wi emeria mua ona Mua Maneka-ke kaken eliwa wia naep wia iikirowiya nain kiiriw me muewikuan. 36Wi ensel saarik ikaikuan ne nainiw me umikuan. Mua Maneka ona wia iikiroweya ona muuka wiipa wiar ikaikuan. 37Ne mua umep iikirowa opora nain iiriw Moses pun ariman maep-puak. Moram nomokow gelemuta wilinem-ikua nain urufap Mua Maneka maemi maek, ‘Mua Maneka eena Abraham, Aisak ne Yekop wia urufam-ikaiya,’ naap maek. 38Wiam arow iiriw umemik, nain Mua Maneka-ke wia urufam-ikaiya. Naapeya mua umemik nain pun Mua Maneka mokoka-pa wi mokok enuma saarik ikemik.” 39Naap maeya wi sira amis mua papako-ke maakemik, “Oo, somek mua, no makena maen.” 40Wi nainiw opora maakowa nain rurukerap oram maneka ikemik.

Yeesus wia nokarek, Krais naareke

(Matiu 22.41-46, Mak 12.35-37)

41Ne Yeesus nainiw wia maakek, “Wi naap maimik, Krais-na Dewit nembesir-ke, nain kamenap? 42Moram Dewit ona feenap maek nain somek buk-pa ikua,

‘Mua Maneka-ke yena Maneka maakek, “No yena aken ekeria-pa efar pokap ikaeya wi iiwua iiwawun no kepur tepak-pa wia wuamkun nos-ke wia ifemakep ikainan.” ’
(Someka 110.1)

44Dewit ona nembesir nain ‘Yena Maneka-ke’ naek. Ona nembesir nain kamenap ona Maneka wiar ikainon?” Naap wia nokarek.

Yeesus wi sira amis mua sira wiar firekak

(Matiu 23.1-36, Mak 12.38-40)

45Aria teeria maneka nan ikok Yeesus opora wiar miimam-ikaiwkin ona teeria wia maakek, 46“Ni wi sira amis mua wia uru-urufami. Wi mia suuwowa maa-maala wuap soomarimik. Ne fiirimow epa-pa mua tetera-ke yia naemi baliwep yia ane-puukuk naep kookalimik. Lotu koora-pa epa eliwa ne pokow eliwa-pa pokowa kookalimik, ne enow maneka onimik nain wi miimowa-pa pokowa kookalimik. 47Wi emer apura wia peeskimemi maa unowa wiar ifemakimik. Ne wadolalemi Mua Maneka farowa maala mufimik. Wi wadol sira nain-pa ikoka pina manek akena aawikuan.”